Sheekadii DHOOF iyo DHAXAL CAASHAQ (Qaybta 29aad)

Aabeheed iyo Hooyadeed oo ka war sugayay  jawaabta ka soo yeeri doonta gabadhooda oo iyagu u fasirtay in warqadda marka ay akhrisato kadib inta u timaado ku tiraahdo “Liibaan wuu i soo deyriyay ee wiilka aad rabtaan i siiya, waan idinka duceysanayaaye” ayaa qeyladii gabadhooda iyo sal juglaha ay u dhacday naxdin iyo argagax ka qaaday, waxayna hal-haleel ku galeen qolkeedii, mise sidii derin duug ah oo meel la isaga tuuray ayayba dhulka u waran tahay, Hooyadeed ayaa ku soo foorarsatay  “Ladan…Ladan….War Ladan” ha sheegin wax u jawaaba, Hooyo wey iska uur-nugushahee murugo ayaa qalbiga loo dhaafay, ilmo ayaana ka soo hoortay “Allaaaa ma dhimatay Ladan, Hooyo ila hadal maxaa kugu dhacay?” Jawaab maleh, Hooyadii ayaa iska barooratay …. “Alla dhimatay Luuladeydii aan ifka ka dugaashanayay, bello Alle hakuu keeno Jaamacow waa adiga waxa gabadheyda sidan u galay, baas Allaha ku rido oo beerka halaguu dhaafo, sun baad gabadheyda u walaaqdeen adiga iyo wiilka baas ee aad adeerka u tahay….Alla anigaa balaanbalay… Alla anigaa….” ayay Hooyadii Waris ahayd ku barooratay.

 

Jaamac isagu hadalkii ayaa ku xirmay, indhaha ayuu mirig-mirig ka siiyay, xitaa qalbigiisa kuma soo dhicin in uu yiraahdo “Dhakhtar aan geyno gabadha” oo wuuba maahsan yahay, shalaayti maxay soo kordhisaa dambi mooyee… qoomamo iyo shallaay ayuu qalbiga isaga shubay, naxdin iyo qaracan ayuu deris la noqday, habartiina catow iyo barroor ayay maciinsatay oo af mugii iska dhawaaqday, wixii afkeeda soo qaban karayna isaga hadaaqday.

 

Baroorteedii ayaa waxaa ku soo baxay Booyaasadii guriga iyo Jamaal oo darawalkii reerka ahaa, isla markiiba Jamaal wuxuu isha ku dhuftay Ladan oo dhulka goglan, ilbiriqsi gudaheedna wuxuu arkay warqad dhinaceeda taala oo uu si hoose isha ugu xaday, isla markiiba akhris boobsiis ah ayuu warqadda indhaha ku mariyey, qaracan weynaa wuxuu ogaaday in warqadda laga raacay, wuxuuna ku soo jeestay Oday Jaamac oo uu ku yiri “gabadhu hadday xannuunsan tahay maxaad ka daawanaysaan maa Isbitaal la geeyo” markiiba inta uu soo baraarugay ayuu yiri “waxaan garan weynay baad garataye orod gaariga inoo diyaari”  markiibana Jamaal gaarigii ayuu soo diyaariyey oo Ladan inta la soo garab galay lala beegsaday Isbitaalka.

 

Markii Isbitaalka la geeyay waa lala tacaalay oo dawooyin kaalmaati ah la siiyay, daqiiqado kadib ayayna xaaladdeedii caafimaad dib u soo bidhaantay, waxaana la soo faray in ay nasiino fara badan samayso oo maskaxda ay dejiso.

 

Xaaladda Ladan markii ay caadigeedii ku soo laabatay waxaa loo mahad celiyey Jamaal oo isaga soo xusuusiyey waalidkeed oo isku buuqsan in gabadha Isbitaal la geeyo, waxaana Jamaal wanaag iyo abaalba uu ka ergaday Ladan waalidkeed, gaar ahaan Hooyadeed oo wixii markaa ka dambeeyay bilowday inay Jamaal dhaqaalayso, isla markaana wax kasta oo jira u sheegto, maadaama uu qeyb weyn ka qaatay badbaadinta gabadheeda, waxayna Hooyadu u kashiftay Jamaal jalaafadii loo dhigay Ladan ee sababtay inay miyir gaddoonto, taasoo looga dan lahaa shirqool jacayl.

 

Jamaal oo Ladan la dhinac ahaa, xiriir walaaltinimo iyo wax isu sheegna uu ka dhexeeyay ayaa sirtii u kashifay Ladan una sheegay in warqadda Liibaan u soo diray la bedelay oo qoraalkii sunta ku noqday ee ku qornaa la been sameeyay, Liibaanna uusan Jacaylka ku dayicin, waxa uuna Jamaal kula heshiiyay Ladan in arrinta aysan la kashifin, balse ay la socoto sida ay wax u jiraan uun.

LA SOCO AXADDA KALE (INSHA ALLAAH)

W/Q: C/RAXMAAN CUMAR MADOOBE (CAAQIL  DALMAR)

caaqildalmar@hotmail.com

Short URL: http://www.somaaljecel.com/wp/?p=3697

Posted by AqilDalmar on Sep 25 2011. Filed under <= SHEEKADA, DHOOF IYO DHAXAL CAASHAQ, SHEEKO / HAL-ABUUR, WARARKA/NEWS. You can follow any responses to this entry through the RSS 2.0. You can leave a response or trackback to this entry

You must be logged in to post a comment Login

Search Archive

Search by Date
Search by Category
Search with Google

Photo Gallery

Log in | Farshaxanku waa: SOMAALJECEL NEWS NETWORK