Sheekadii DHOOF iyo DHAXAL CAASHAQ (Qaybta 28aad)

Markii ay is macsalaameeyeen kadib ayaa waxaa guriga soo gashay Ladan oo ka timid Iskuul ay ka baraneysay luqadda Ingiriiska oo ay gelinka dambe aadi jirtay, iyadoo Jamaalna uu gaariga ku geyn jiray, markii ay soo gashay aabaheed ayaa ugu bishaareeyay inuu u hayo akhbaar ay ku farxi doonto, “Owguuriyo gabadheydiiyey waxaan manta kuu hayaa wax aad ku farxi doonto’  waxey si hal-haleel ah oo fircooni ku dheehan tahay ugu war celisay “Aabe maxey yihiin waxaas?, beryahan dambe ima aadan dhihin wax kaa farxiya ayaan kuu hayaaye” markaasuu si boobsiis ah ugu jawaabay “Warqad uu soo diray Liibaan oo uu sanduuq boostaheyga uu kuugu soo hagaajiyay ayaan kuu wadaa ee wax ku farxad gelinaya sow ma aha aabe?”, iyadoo dhoola caddeyneysa oo farxad darteed inay samada isku laasho ku sigatay ayay ku tiri  “aabe i sii hee ha iga daahinine, hadalkana meesha iigu ekee warqadda ayaa muhiim ii ehe”.

 

{Allow yaa u sheega oo ku yiraahda abshir kuuma ahane iska daa warqadda, yaa ku wargaliya in shirqool caashaq loo degay oo niyad-jab ay kala kulmi doonto warqadda} iyadoo dhararaysa daqiiqadaha warqadda uu aabeheed u soo bixinayo ayay ka daba gashay qolkiisa oo isagoo boorsadiisii fatashaya ku tiri “Aabe maxaad jeebka isaga soo gelin weysay oo boorsada aad kala doontay, xilligan  mar horaan akhrin lahaaye”  si kaftan ah ayuu ugu yiri “Waxaan ogahay sida warqadda ay kugu weyn tahay iyo meesha uu Liibaan kaa joogo, sidaas ayaan anigana u dhaqaaleeyay warqadda oo halkan ugu soo xafiday”.

 

Markii Ladan ay warqadda gacanta ku dhigtay inta aysan qolkeedii gaarin ayay galkii ku dahaarnaa ka daliiqday, kadibna u degdegtay qolkeedii oo inta  isku tuurtay sariirteedii akhris ku bilowday.

 

Ereyadii ugu horreeyay ee qoraalka ayaa la noqday kuwo aysan ku qancin, iyadoo madaxa luxeysa ayay haddana hoos ugu sii daadegtay qoraalka, kaba sii daran, ereyba ereyga ku sii xiga waa ka sii qaraar badan yahay, wey maleysan weysay, indhaha ayaa caad humaag ah ka korey, markaasay indho maraan-marasho ku waalatay, wey la ahaan weysay oo inay riyo soo jeed ah ku jirto u fasiratay, markaasay mar kale akhris ugu laabatay warqaddii….

 

{Ka darroo Dibbi dhal} naxdin, qaracan iyo murugo ayaa soo weeraray, rajadii iftiinka ee u baxaysay ayaa mar kaliya si kedis ah u oodantay, waxaa warqaddii buuxiyey ilmo ka qubanaysay, dhabankeeda ayay maciin ka doontay oo calaacalaheeda cusjisay, indhahana galka ka bixisay iyadoo ku togeysa qoraalkii siloonaa ee horteeda yaalay….

 

War isuma heyn oo maqane jooge ayay ahayd… warqaddii ayay dhulka isaga tuurtay oo safiitada sare ee qolka indhaha u amaahisay, wey istaagtaa…. oo haddana fariisataa…. wey socotaa oo haddana sal dhigtaa… qolka ayay marba dhan u gaaf wareegtaa…. isla hadal ayay bilowday “Ma dhici karto oo suuragal ma aha, Liibaan sidan isuma bedeli karo, maya…. Maya” ayay si xiriir ah u tiri, haddana iyadalee baa isu war celisoo tiri “Waa Bani’aadam wuu is rogi karaa, waa wax dhici kara in Naagta Jarmalka ah uu iga raaco” iyo hadallo kale ayay iskula hadashay.

 

Mar dambe ayaase lagu soo baxay dhawaq dheer oo ay ku dhufatay “dheel dheel iguma dayici karo Liibaan….. !!”  markii uu dhawaaqsi dheer afkeeda ka sii dhammaanayay ayay sal jugle dhulka ugu dhacday oo miyirkii ka tagay.

LA SOCO AXADDA KALE

Qoraaga waa: C/raxmaan Cumar Madoobe (Caaqil  Dalmar)

caaqildalmar@hotmail.com

Short URL: http://www.somaaljecel.com/wp/?p=3502

Posted by AqilDalmar on Sep 18 2011. Filed under <= SHEEKADA, DHOOF IYO DHAXAL CAASHAQ, SHEEKO / HAL-ABUUR, WARARKA/NEWS. You can follow any responses to this entry through the RSS 2.0. You can leave a response or trackback to this entry

You must be logged in to post a comment Login

Search Archive

Search by Date
Search by Category
Search with Google

Photo Gallery

Log in | Farshaxanku waa: SOMAALJECEL NEWS NETWORK